Dreejspan 2020:

Prins Rick I 

Adjudante Roy en Max

 

 

Prins Rick 1

Gebaore en getaoge in de Wien in ’88 beej mien elders. Opgegreujd same mit mien 3 jaor aldere broor. Weej ware altied boete aan 't speule: stoeprendje, skeelere, schete mit piel en buus, hutte bouwe in 't bos beej Manresa en neteurlik neet te vergaete in de herfs zelf petatte poefe beej 't wierikse.

Vanaaf mien 6de vroog 'ne vrind of ik mei woel gaon nao de scouting. Ik ging mei nao scouting Manresa en kwaam beej de Bevertjes terech en dit vónd ik geweldig. Daonao alle verscheie speltakke gehad en vanaaf mien 18e bin ik zelf leider gewaore, beej de Bevertjes. 

Beej de scouting vónd ik 't vruger 't leukste um boete rónd te renne in de bös, keukes te sjorre en as 't ech werm waas mit 't zomerkamp um 'n zelfgemak zwumbad te bouwe, wie 'nen echte MacGyver mit inkel zwitsers zakmets en ein zeil.

Noow, as leider, vind ik 't geweldig um same mit ós stafteam oetdagende en lierzame speule te organisere veur de blage van de scouting. Door de jaore haer zuus se de kinder opgreuje en zich óntwikkele en bin ik gruuets det ik dao ein aandeil in meug hebbe.

Ofschoeën ik, wie ik leider woort beej de Bevertjes, 't nog neet wis aevel dao heb ik mien vrinde liere kinne die noow mien adjudante zien gewaore. Roy was toen al staflid beej de Bevertje en Max waas ein van die Bevertjes.

Vastelaovend zit mich in 't blood. As Esta woort ik tot Prins beej ózze scouting oetgerope ónder 't Vlaegelkesbal en inkele jaore later had ik de ier um Jeugadjudant beej de Wien te meuge zien.

Zelf bin ik altied meigegaon mit de Groeëte Venlosen Optoch. Iers altied as blaag mei op de wage beej Joekskapel Schots en Scheif en later nog mit de Vrinde van Manresa. De letste 6 jaor loup ik mei as Faatse wao beej ik zelfs eine kier de Veldeke trofee heb meuge winne (toen waar de Mikwe(g)!

Vastelaovesgezelschap De Vogelhut heb ik liere kinne, umdet ik vanaaf mien 16e achter de bar stónd um pilskes te tappe en oet te deile tiedes de Prinseballe, recepties en zittinge van de Vogelhut. Nao inkele jaore kreeg ik mienen druim um gevraog te waere as Prins en idder jaor weer haopde ik, det ze van de Prinsekemissie eine kier beej mich op de stoep zoele staon um mich DE VRAOG te stelle. Die vraog bleef nog einen tied oet.

In de tössentied verhoesde ik langsaam van oeës richting noord. Um mich oetintelik toch ech in noord te settele en same ein hoes te koupe mit mien maedje Linda, miene steun ein toeverlaot.

Toen de veurzitter van de Vogelhut mich waat woel kómme bringe veur de scouting, wis ik al genóg. Heej zit mier achter, dach ik. En ik hoofde neet lang euver mien antwaord nao te dinke: JAO!

Veurzichtig had ik miene ierste adjudant, Roy, al ingelich. Same hadde weej vruger al gespraoke euver dees meugelikheid en wiste weej van ein det weej ós zoele vraoge. Dus zien antwaord waas gemekkelik: Jao.

Ik woel d'r gaer ein scoutingfees van make en toen veel mien oug op ein van ós nietste stafleje opgegreujd vanoet de Bevertjes, Max. Same zitte weej in 'tzelfde stafteam en hae kwaam in dezen tied ouk beej mich um d'n hook te woeëne. Mit de vraog um same ein programma te make veur scouting, heb ik um miene kant oet gelok. Ouk hae zag jao en kóste weej beginne aan de veurbereidinge veur deze schoeënen tied as 50ste Dreejspan van Vastelaovesgezelschap De Vogelhut.

 

 

 

 

 

 

Adjudant Roy

As kleine bókseman opgegreujd in ’t Ven beej mien pap en mam. Insigs kind, maar toch 't hoes altied vol vrinde en vriendinkes die bleve aete en slaope, kort gezag: aope hoes. 

As jungske van 7 bin ik eine kier mit mien naef meigegaon nao scouting (dae woeënde op de Maagenberg) en zoeë dus beej Scouting Manresa terech gekómme. Toen nog beej de Esta’s. 

In daen tied woel ik ouk gaon foetballe beej ’t Ven. Dit deurde aevel neet lang. Ik vónd 't leuker um alle wörm te redde, mit as gevolg det mam iddere kier 't wasmesjien vol had mit laevende wörm. Wie toen ouk d'n trainer kwaam mitdeile det 't toch ech baeter zoel zien as eure zoon ein andere sport ging doon, ware mien zaegeninge al flot geteld.

Ouk de vastelaovend woort mich mit de paplaepel ingegaeve. As kleinen blaag mit pap en mam nao ’t Höltje um beej Helmi al hiel vruug mien ierste snörke te meuge drinke. Vanoet t Ven ging ik op iets aldere laeftied de vastelaovend viere in de stad. 

D’n optoch loupe is mich ouk neet vraemp, mit de Vrinde van Manresa ein flink aantal optochte meigeloupe, en wie in 1 jaor 't loupe neet mier ging, ging ik zelfs in de rolstool mei.

Al die jaore beej scouting gebleve en oetintelik meugde ik zelf staflid waere beej de Bevers. Dao kwaam ik ózze prins taege en woort ein vrindschap gebaore. 

De schoeël waas neet mien groeëtste hobby, veural de middelbare neet, ik vónd 't maar allemaol lariekook die nutteloze vakke. Mien passie loog al vruug in de hölpverlieëning. De Havo heb ik daorum ouk neet aafgemak en bin nao 't MBO gegaon um as pedagogisch werker aan de slaag te kinne gaon.

Binne 4 jaor had ik de juuste pepere op tes en kós ik mien vleugels gaon oetslaon. Nao ein flink aantal jaore te hebbe gewerk in 't opvanghoes van keplaon Breure, later bekind as Doortoch, bin ik mich mier gaon richte op jeug en jóngere. Via inkele organisaties en mit verscheie functies oetintelik terech gekómme beej de gemeinte Mestreech. Heej werk ik as jeugcoach veur mit name de 14 tot 18 jäörige mit zwaore perbleme. Ik perbeer same mit eur, eur laeve weer op de rails te kriege.

Mien ganse laeve al hald ik mich bezig mit meziek. Vanaaf mien 6e jaor kreeg ik pianoles, maar nao inkele jaore waas ik Bach, Mozart en kónsorte meug en ging ik mich mier en mier richte op keyboard.

As puber speulde ik vuuel in de begeleiding van kinderkerkkoeëre, zoeëwaal in 't Ven as in 't Blierikse.

De letste jaore is meziek veural mien groeëtste hobby en speul ik zó’n bietje alles wao ik maar note van kin bemachtige. Ouk meziek schrieve en componere. En arrangemente d’r beej make is mich gegaeve en doon ik dan ouk regelmaotig (soms wies vervaeles toe volges de bure).

 De letste 2 jaor vónd ik 1 instrument te weinig en bin ik begós mit móndharmonica. Hiel recent is dao ouk de gitaar beejgekómme.

 

Ruum 4 jaor geleje kwaam ik mien taegeswaordige leefde taege, Anouk. Det ging nogal stormachtig, vrinde van mich zoele zegge, det ging op zien ‘Roys’: via internet zich same taegekómme, 2 dates gehad en drek daonao woeënde weej al same, in Venlo-oeës.

 

2 jaor geleje hebbe weej beslaote um de stad te verlaote en de rös van 't dörp op te zeuke en hebbe  weej ein hoes laote bouwe in Velde. Vurrig jaor hebbe weej heej de sleutel van meuge kriege en waas d'n bouw gereid. Dao woeëne weej noow. 

Wie Rick mich vroog as adjudant hoofde ik gen secónde nao te dinke, al ierder hadde weej oetgespraoke det weej dit noeëts zónder ós zoele doon. De keus um  't daonao gans binne scouting te halde waas ouk flot gemak en Max woort gevraog. Scouting is waat ós allemaol duit verbinde.

 

 

Adjudant Max

 

Ik bin gebaore op 12 juli 1999 in Venlo. Same mit mien elders en zuske bin ik opgegreujd in 't Greunveld, wies det ik op mien 10e nao de Baoveste Meulewaeg verhoesde. Baove op d'n berg bin ik altied aan 't bouwe aan miene skelter gewaes, taegeswaordig bin ik gegreujd en ouk dae “skelter” want det is noow 'ne sjieke Mini Cooper.

 

Nao de basisschoeël bin ik begós op 't Blariacumcollege, nao 2 jaor meus ik ein keus make en  woel ik vaerder d'n techniek in. Dit ging allein neet op 't Blariacum, dus bin ik daonao nao 't Broekhin gegaon. Ederen daag minimaal twieë oor op d'n draodaezel haer en truuk nao Zjwame. Heej heb ik vuuel gelierd euver d'n techniek en det haet mich oetintelik beej mien taegeswaordige opleiding gebrach. Ik lier noow veur technicus mechatronica en systeme, en werk ik daonaeve beej Sormac as elektromonteur in opleiding.

 

Van kleins af aan vier ik al vastelaovend in Venlo, mitgesleip door pap en mam. Same in aafgestumde pekskes kreeg ik toen al de smaak te pakke.  Taegeswaordig gaon ik nog altied gaer

op stap, veural mit vastelaovend, maar ouk daoboete. 

As de vrinde heej gennen tied of zin in hebbe, sleutel ik 't leefste aan mienen auto. Heej heb ik michzelf van jóngs af aan ouk al waegwies in gemak. Zelfs mien opa en oma ware gek van Mini’s en miene pap al hieëlemaol; dees hobby haet hae dan ouk  aan mich doorgegaeve.

 

As beejbaantje heb ik 5 jaor lang auto’s gewasse en gepoets, en daen tik um mienen auto zoeë  schoeën en moeëj te halde is gebleve en smeis poets en was ik ouk de autos van andere minse.

Ik bin sinds kort verhoes same mit mien elders ( “jóngste adjudant”) nao de Florence Nightingalestraot dit is toevallig um d'n hook van 't hoes van de Prins.

 

Roy en Rick ware mien leiding beej de Bevertjes wie ik 'nen bóksenbaom van 4 waas. Zestieën jaor later staon ik same mit Rick zelf als leiding van de gidse en verkenners. Nao zelf in deze groep als lid te hebbe gezaete vind ik 't leiding zien van deze groep nog leuker. Noeëts had ik kinne dinke det ik later same mit Rick en Roy ein Dreejspan van Vastelaovesgezelschap De Vogelhut zoel vorme.